去泰國食街邊河粉是常識，但大熱天時，食一兩餐都還可以，日日食餐餐食有時都會辛苦的。如果可以在商場中庭吹住冷氣食，加上有鋼琴師在旁伴奏，你又 buy 唔 buy 呢？

話說在曼谷四面神往 BTS Ratchadamri 方向途中，有間小型商場 Peninsula Plaza，裡面的中庭位置就有這間星級船河粉。咪以為開在商場內就是新派，其實裡面的船河粉湯底已經有三十年歷史，用上祖傳秘方炮製而成，血紅色的湯味道非常濃郁！

好似最基本的魚蛋魚片冬蔭湯湯底河粉，140銖有交易。如果你豪氣一點，可以選擇日本黑毛豬河粉(260銖)、日本和牛河粉(320銖)。

又或者你不想食河粉，亦都可以點其他。例如有小點心、串燒、濕炒河、芒果糯米飯，還有一款椰青法式焦糖布丁，十分好味。去完四面神走過來食碗粉麵，舒舒服服亦相當寫意。

現場環境高雅，座位舒適。當然價錢就不是街邊價，但也不至於超貴，不少本地人都說味道很好。都係那句：百貨賣百客，大家仍然可以選擇街頭15銖一碗的，但如果你想換換口味，不妨來這裡試試。

座標：13.742174,100.5387601